Petisyon sou kriz ki ap travèse estrikti ki reprezante etidyan nan ENS.
Douvan kriz k ap travèse sektè etidyan an anndan ENS lan, nou menm ki se yon ansanm etidyan ki soti nan divès depatman nan lekòl lan, nou deside pataje konpreyansyon nou, pozisyon nou ak pwopozisyon nou sou kriz sila a. Kisa kriz lan ye menm ? Kisa ki lakoz tout pwoblèm sa yo ? Ki solisyon nou kapab jwenn pou rezoud pwoblèm sila a ?
Nan pwosè vèbal ki te ekri pandan mwa jen 2024 lan, yo fè nou konnen manda 7 manm Co-Cetens ki te genyen dènye eleksyon ki te fèt yo, ap fini lè ane akademik 2023-2024 lan fini. Ane akademik sa a te fini nan mwa septanm 2024. Sa vle di manda manm CO-CETENS yo fini nan dat sa a. Nou nan mwa jiyè 2025. 9 mwa apre ane akademik 2023- 2024 la fini, se menm moun yo ki toujou nan konsèy la, y ap okipe yon fonksyon pandan manda yo fini !
Tout manm Co-Cetens yo te dakò pase 9 mwa nan pòs yo apre manda yo fini. Yo tout te rete an plas, yo pa fè yon pa kita, yon pa Nago. Sitiyasyon sila a pa diferan ak sa ki konn abitye pase nan peyi nou, kote ou konn jwenn yon seri dirijan rete nan pòs yo, apre manda yo fini. Pa bliye se eleksyon ki te mete manm Co-Cotens yo, se eleksyon ki fè yo lejitim. Sa vle di depi manda yo fini, yo pa lejitim. Yo pa dwe ret an plas, epitou yo pa dwe pran okenn desizyon nan non nou. Nan eleksyon ki te fèt nan UEH lan, kote te gen yon nouvo rektè ki te ranplase ansyen an. Reprezantan ekstèn lan te vote. Li te vote pandan li ilegal. Sa vle di yo pran desziyon nan non nou , pandan manda yo fin. Se tankou ou te gen yon prezidan ki gen yon manda 5 lane (2012-2017). Epi an 2018, li al siyen yon kontra ak bank mondyal nan non peyi an.Èske sa nòmal ? Sa se demokrasi ? Èske mòd konpòtman sa yo etik ? Èske yo moral ? Diskisyon ki te eklate ant reprezantan ekstèn lan ak sekretè jeneral Co-Cetens lan se yon pwoblèm ant de kòkòday li ye. Jiskaprezan se pa yon koze ki nan enterè etidyan. Son batay pou pouvwa ! Pa gen youn nan yo nou ka fè konfyans. Tou de reprezantan sa yo te dakò pase 9 mwa nan yon pòs apre manda yo fini. Nou abitye wè batay pouvwa sa yo nan peyi nou : Lavalas vs PHTK, PHTK Jovenelis vs PHTK Matelis. Nou wè fim sa yo déjà !Kriz sa a se yon kriz valè, yon kriz etik, yon kriz moral li ye.
Nou anfas yon sitiyasyon kote yon seri moun pa gen kouray wete kò yo nan pòs yo lè manda yo fini ! Se yon konpòtman ki egziste anndan sosyete an ki ap repwodui anndan yon enstitisyon ki anndan sosyete an ki se inivèsite an. Poukisa nou di son kriz valè, etik ak moral ? Cetens gen 28 moun ladan l, sa vle di 21 moun aksepte 7 moun rete nan pòs yo pandan manda yo fini ?!!!!Pa t gen okenn aksyon ki te poze kont deriv sa yo. Tout rès manm Cetens yo te rete silans fas ak 7 grenn moun ki pa wete kò yo nan pòs yo. Li lè li tan pou nou kwape pratik sa yo nan mitan nou ! Fòk nou pran yon seri desizyon pou nou kwape mòd konpòtman sa yo.
Se nan sans sa a, nou prezante ansanm pwopozisyon sa yo :1-Jije epi sanksyone 7 manm Co-Cetens yo ak tout manm Cetens ki te la pandan ane akademik (2023-2024) lan ki pat poze okenn aksyon pou montre dezakò fas ak volonte 7 grenn moun te genyen pou rete nan pòs yo apre manda yo.2-Òganize yon Asanble Jeneral pou yo ka jije tout moun nou sot site yo, sanksyone yo.Pandan Asanble Jeneral lan se pou nou bay tout etidyan dwa pou yo vote manm Co-Cetens yo. Elimine koze “élection second degré” an.3-Pibliye epi kesyone règleman entèn Cetens lan. Se pou yo pibliye yo, yon fason pou tout etidyan ka wè yo !
Kanta pou rankont ki te fèt mèkredi 30 jiyè 2025 nan lè 11è nan maten avèk 10 manm CETENS yo. Bò kote pa nou, nou pa rive konprann kouman yo pran desizyon sa yo. 1)Pa t gen kowòm. 2)Sanble son sèl grenn moun ki fè tout pwopozisyon yo. Kisa 9 lòt moun yo te pwopoze menm ?
Poukisa nou fè pwopozisyon sa yo ?1- Si nou pa jije epi sanksyone manm Co- cetens ak Cetens yo, sa pral vle di nou aksepte deriv yo, epi nou admèt se yon kriz elektoral kriz sa a ye.Okenn demokrasi paka fonksyone ak eleksyon sèlman. Prensip etik ak moral yo fondamental !2- Rezon ki fè Nou mande Asanble Jeneral lan, se pou pèmèt tout etidyan yo rive konprann kisa Cetens ak CO-Cetens lan ye. Epi pèmèt tout moun kapab vote pou nou ka dekonsantre, demokratize desizyon yo, 28 moun pa dwe ap deside pou tout etidyaetidya yo ! 3-Objektif asanble jeneral la se pou penmèt transparans nan reprezantasyon etidyan an, pou tout Moun ka konprann kisa ki CO-CETENS ak Cetens lan.
FORUM DE CONCERTATION Contacter l'auteur de la pétition