#174: Maria Joana Verny - se ridiculizan ? Ailàs, non...

Siáu consent, de segur. Aquò dich, i a en Provença de relacions mai pasibles entre occitanistas e mistralencs que o vòu far crèire lo Collectiu Provença : lo jornau "Provènço d'Aro", de mitans culturaus neutres sus la question de l'apartenéncia dau provençau a l'ensems occitan, la preséncia d'un representant dau Counsèu de l'Escri mistralen au consèu lingüistic dau Congrès permanent de la lenga occitana.

En realitat, lo Collectiu Provença es pas solament antioccitanista : es tanben antimistralenc per sa volontat suicidària de negar l'evidéncia mistralenca e anteriora a Mistral de l'unitat de la lenga nòstra, per son refús de chifrar seriosament a la difusion dau provençau dins la societat e dins l'ensenhament, de desplaçar la question fondamentala de la feblesa dau provençau ò de l'occitan vèrs un absurde conflicte de grafias.

#175: DanièlOlivar - Re: se ridiculizan ? Ailàs, non...

o sabi, tot aquò. Amb la FELCO (ne recebes la letra ? basta de mandar un corrièl a l'adreiça qu'es sul sit), seguissèm aqueles afaires provençals dempuèi bèl brieu e, tot occitanistas que sèm, avèm de plan bonas relacions amb lo Felibritge e amb Prouvenço aro (i soi abonada, coma soi abonada a Aquò d'aqui o a la revista del Felibritge). Empacha que pregam dempuèi de temps que i aguèsse una accion vesedoira comuna sul terrenh provençal (e pas soncament a Tolosa, Besièrs o Carcassona, que los elegits provençals se'n chautan) e qu'arribam pas de nos faire ausir.